အဆိုးမြင်သမား အသိမိတ်ဆွေတွေ၊ လုပ်ဖော်ကိုင်ဖက်တွေကို ကျွန်တော်တို့အားလုံး ကြုံတွေ့ဖူးကြပါတယ်။ အလုပ်နဲ့ပတ်သက်ပြီး အမြဲတမ်းညည်းတွားပြောဆိုနေပေမယ့် ပြေလည်စေမယ့် ဖြေရှင်းချက်မရှာနိုင်သူမျိုးနဲ့ အလုပ်အတူလုပ်ဖူးမှာပါ။ ဒီလို အဆိုးမြင်သမားတွေက လူတိုင်းကို စိတ်ပျက်စေပါတယ်။ သူတို့သွားလေရာမှာ အဖျက်စွမ်းအားတွေ၊ စိတ်ပျက်စရာတွေ ဖြစ်လာတတ်ပါတယ်။ သင့်အနေနဲ့ ဂရုမစိုက်ဘူးဆိုရင် သူတို့အရှုပ်တွေထဲမှာ သင်လည်းပဲ ပါဝင်ပတ်သက်သွားပြီး သင့်ရဲ့အာရုံစူးစိုက်မှုနဲ့ ရည်မှန်းချက်တွေ ပျောက်ဆုံးသွားနိုင်ပါတယ်။ ဒါ့ကြောင် အဆိုးမြင်သမားတွေနဲ့ ဆက်ဆံရတဲ့အခါမှာ အသုံးပြုရမယ့် နည်းလမ်း(၇)ခုကို ဖော်ပြလိုက်ပါတယ်။
၁။ အကန့်အသတ်နဲ့ ပေါင်းပါ။
အဆိုးမြင်သမားတစ်ယောက်ပြောသမျှကို ထိုင်နားထောင်နေရတာကို စိတ်ဖိစိးမှုအဖြစ်မခံပါနဲ့။ သူတို့ရဲ့ မကောင်းမြင်တဲ့စွမ်းအားက သင့်ရဲ့ဘ၀ကိုပါ သက်ရောက်ပြီး စိတ်နေစိတ်ထားကိုပါ ထိခိုက်စေနိုင်ပါတယ်။ ဒါ့ကြောင့် အဆိုးမြင်သမားတွေနဲ့ ပေါင်းသင်းဆက်ဆံရတဲ့အခါမှာ အကန့်အသတ်တွေထားရှိပြီး တတ်နိုင်သမျှ ခပ်ကင်းကင်းနေပါ။ မဖြစ်မနေပြောဆိုဆက်ဆံရမယ်ဆိုရင်လည်း လိုရင်းတိုရှင်းပဲပြောဆိုပါ။ သူတို့ရဲ့ မကောင်းတဲ့အကျင့်စရိုက်ကို မထိန်းချုပ်နိုင်ပေမယ့် သူတို့နဲ့ ဆက်ဆံပုံနည်းလမ်းကိုတော့ ထိန်းချုပ်နိုင်ပါတယ်။
၂။ ညည်းညူတတ်သူတွေကို ရှောင်ပါ။
ဘယ်ကိစ္စမဆို ညည်းညူနေတတ်သူတွေက သင့်ဘ၀အတွက် ကောင်းကျိုးမရှိပါဘူး။ သူတို့က ပြဿနာကိုပဲ ကြည့်နေတတ်ပြီး အဖြေမရှာနိုင်သူတွေ ဖြစ်ပါတယ်။ သင့်ရဲ့စိတ်ကူးတွေကို ရိုက်ချိုးပြီး သူတို့လို သိမ်ငယ်စိတ် ၀င်လာအောင် သိမ်းသွင်းပါလိမ့်မယ်။ ဒီလိုလူမျိုး မိတ်ဆွေအပေါင်းအသင်း၊ မိသားစုဝင်နဲ့ လုပ်ဖော်ကိုင်ဖက်တွေထဲမှာ ရှိခဲ့မယ်ဆိုရင် တတ်နိုင်သမျှ မပတ်သက်မိပါစေနဲ့။ မဖြစ်မနေလိုအပ်မှသာ ဆက်ဆံပါ။
၃။ အဆိုးမြင်စိတ်များသည့် ၀န်ထမ်းများကို ရှင်းထုတ်ပါ။
သင့်လုပ်ငန်းရဲ့အနေအထားက သင့်အမှတ်တံဆိပ်အတွက် အရေးကြီးပါတယ်။ မကောင်းတဲ့ညဉ်ရှိတဲ့ ၀န်ထမ်းတစ်ယောက်က လုပ်ငန်းခွင်တစ်ခုလုံးကို ဆိုးကျိုးသက်ရောက်စေနိုင်ပါတယ်။ ငါးခုံးမတစ်ကောင် ကြောင့်
တစ်လှေလုံးပုပ်ဆိုသလိုမျိုး အရင်က အပြုသဘောဆောင်တဲ့ စိတ်ထားရှိတဲ့ ၀န်ထမ်းတွေမှာ မကျေနပ်ချက်တွေ ရှိလာနိုင်ပါတယ်။ ဒါ့ကြောင့် အဆိုးမြင်သမားတွေကို မြန်မြန်ရှင်းထုတ်နိုင်မှ ဒီအခြေအနေကို ကိုင်တွယ်နိုင်မှာ ဖြစ်ပါတယ်။ တွေ့ဆုံမှုတစ်ခုလုပ်ပါ။ သင့်ရဲ့စိုးရိမ်မှုကို ပြောပြပြီး ပြောင်းလဲဖို့ အခွင့်အရေးပေးပါ။ ဒီလိုမှ ပြောင်းလဲမလာဘူးဆိုရင်တော့ အလုပ်ထုတ်ဖို့ လိုပါပြီ။၎။ လိုအပ်လာမှ ထိပ်တိုက်ရင်ဆိုင်ပါ။
သင့်ကို မခံချိမခံသာဖြစ်အောင် အဆိုးမြင်သမားတွေနဲ့ အချိန်တိုင်းရင်ဆိုင်ဖြေရှင်းစရာ မလိုပါဘူး။ ဒီလို အမြဲတမ်းထိပ်တိုက်ရင်ဆိုင်နေမယ်ဆိုရင် သင်ကိုယ်တိုင်ကလည်း အငြင်းသန်သူတစ်ယောက်ဖြစ်လာနိုင်သလို မကောင်းတဲ့စရိုက်တွေ ကူးစက်သွားပါလိမ့်မယ်။ သူတို့နဲ့ ပြိုင်ငြင်းနေမယ့်အစား လျစ်လျူရှုထားလိုက်ပါ။ သင့်ရဲ့ စိတ်ခံစားချက်တွေကို ထိန်းချုပ်ပြီး အခြေအနေတင်းမာမလာအောင် ထိန်းချုပ်ပါ။ မလိုအပ်ပဲ ပြဿနာအဖြစ်မခံပါနဲ့။
၅။ အခြေအနေကို အလွန်အကျူး မသုံးသပ်ပါနဲ့။
အဆိုးမြင်သမားတွေက ယုတ္တိမရှိတာမျိုးကို ပြုမှုလုပ်ဆောင်တတ်ပါတယ်။ သူတို့ရဲ့လုပ်ရပ်တွေကို လိုက်တွေးနေမယ်ဆိုရင် တန်ဖိုးရှိတဲ့ သင့်ရဲ့အချိန်နဲ့ခွန်အားတွေ အလဟဿဖြစ်ရုံပဲ ရှိပါလိမ့်မယ်။ သူတို့ လုပ်သမျှ ပြောသမျှကို သိပ်မခံစားတတ်အောင် ဂရုစိုက်ပါ။
၆။ လိုအပ်ရင် အကူအညီတောင်းပါ။
အကူအညီပေးနိုင်မယ့် အသိမိတ်ဆွေတွေ၊ ကျွမ်းကျင်သူတွေနဲ့ ဆက်ဆံရေးတစ်ခု တည်ဆောက်ပါ။ ဘယ်အချိန်မှာ အကူအညီတောင်းခံရမလဲဆိုတာကို သိဖို့တော့ လိုပါတယ်။ အဆိုးမြင်သမားတွေနဲ့ ပတ်သက်ပြီး ခံစားရတာတွေ လွန်ကျူးလာပြီဆိုရင် အခြေအနေအရပ်ရပ်ကို တည်တည်ငြိမ်ငြိမ် ရှင်းပြပေးနိုင်မယ့် မိတ်ဆွေတစ်ယောက်ကို အကူအညီတောင်းပါ။
၇။ အကောင်းမြင်စိတ်မွေးမြူပါ။
တစ်စုံတစ်ယောက်ရဲ့ အဆိုးမြင်အယူအဆတွေကြောင့် ကိုယ့်ကိုယ်ကိုအမြင်မမှားစေဖို့အတွက် သင့်ရဲ့ပျော်ရွှင်မှုနဲ့ အဆင်ပြေမှုက အရေးကြီးပါတယ်။ အကောင်းမြင်စိတ်တွေကို မွေးမြူထားပြီး ဘ၀မှာ အဆိုးမြင်သမားတွေနဲ့ ပတ်သက်မိချိန် နည်းနိုင်သမျှနည်းအောင် စီမံပါ။ သင့်မှာ အကောင်းမြင်စိတ်များနေမယ်ဆိုရင် အဆိုးမြင်သမားတွေက သူ့အလိုလိုဝေးရာကို ရှောင်ဖယ်သွားကြမှာဖြစ်ပါတယ်။
No comments:
Post a Comment