"ဝမ်းချုပ်တတ်သူများ အတွက်.... မုံညင်းချဉ် မုံလာချဉ် လုပ်နည်း "

ဝမ်းချုပ်တတ်တဲ့သူများအတွက် အကောင်းဆုံး နဲ့ ဈေးအသက်သာဆုံး နည်းလေးတွေ့ထားတယ်။

ဘာလဲ ဆိုတော့ ကိုယ်တိုင်လုပ်တဲ့ မုန်လာချဉ်ကို ထမင်းစားတိုင်း ထဲ့စားရမှာပါ။

ကိုယ်တိုင်လုပ်မုန်လာချဉ်မှသာလျှင် တာရှည်ခံဆေးကင်းတယ်။ လတ်ဆတ်တယ်။ သန့်ရှင်းတယ်။

ဒါကြောင့် မုန်ညင်းချဉ် မုန်လာချဉ် လုပ်နည်း ကို တင်ပြအပ်ပါသည်။

လိုအပ်သောပစ္စည်းများ-

• မုန်ညင်းစိမ်း ထွားထွား...........၅ ပင်၊
• ထမင်းရည် ..........................မတ်ခွက်နှင့် ၃-ခွက်ခန့်၊
• ဆား...................................လက်တဆုပ်ခန့်၊
• နနွင်း..................................အနည်းငယ်၊

မုန်ညင်းစိမ်းများကို အမြစ်ဖြတ်၊ ရေဆေးပြီး တနေ့မျှ အရိပ်ထဲ၌ လှန်းထား၊ နေ့လယ်လောက်မှာ အရွက်များ နွမ်းလာလျှင် အချဉ်ထည့်နိုင်ပါပြီ။ မုန်ညင်းပင်များကို နေပူမှာ မလှန်းရပါ။ ခြောက်ကပ်ပြီး စားမရနိုင် ဖြစ်သွားတတ်သည်။

စဥ့်အိုး၊ သို့မဟုတ်-ပုလင်းကြီး သန့်သန့်တွင် မုန်ညင်းပင်များကို ခွေပြီး သိပ်ထည့်ပါ။ အပေါ်မှ ဆားနှင့် နနွင်း ပုံပါ။ စဥ့်အိုး သို့မဟုတ်-ပုလင်း တ၀က်ခန့် ရောက်အောင် ထမင်းရည်ကို အအေးခံပြီး လောင်းထည့်ပါ။ ပျစ်ခဲ မနေအောင် ရေ ရိုးရိုးကို ပုလင်း သို့မဟုတ်-ချဉ်အိုးပြည့်သည်အထိ မြှုပ်အောင် လောင်းထည့်ပါ။ ဆား၊ နနွင်းကို ရေမှာ ပျော်ဝင်အောင် လက်ဖြင့် လှုပ်ပြီး အပင်တွေ ရေမြှုပ်လျှင် အိုးဖုံးကို လုံအောင် ဖုံးပြီး သုံးရက်ခန့် ထားလိုက်ပါ။ သုံးရက်ခန့်ကြာလျှင် ရေလည်း ချဉ်၊ အပင်တွေလည်း ချဉ်ပါလိမ့်မည်။ ဆားမပေါ့စေနှင့်၊ မုန်လာကိုလည်း ထိုနည်းအတိုင်း လုပ်နိုင်သည်။

ဖိုးသူတော်

ကိုးကား - မင်္ဂလာသတင်းစဉ်
Credit : http://www.phothutaw.com/2014/01/blog-post_3825.html?m=0