" အဆိုတင်မကပဲ အတီးပါ ၀ါသနာပါတဲ့ Myanmar Idol ရဲ့ Winner ဆုရှင် စောလားထော်ဝါး နှင့်တွေ့ဆုံခြင်း "

 

 မြန်မာနိုင်ငံမှာ Voting စနစ်ပေးပြီး ပထမဆုံးပြုလုပ်ကျင်းပခဲ့တဲ့ Myanmar Idol ပွဲမှာ ပထမဆုကို ထိုက်တန်စွာ ဆွတ်ခူးရရှိသူကတော့ စောလားထော်ဝါးပဲဖြစ်ပါတယ်။ ပြိုင်ပွဲစဉ်တစ်လျှောက်မှာ သူဖြတ်သန်းကြုံတွေ့ခဲ့ရတဲ့ အခက်အခဲတွေနဲ့ သူကြိုးစားရုန်းကန်ရပုံတွေကို သူ့ကို မေးဖြစ်ခဲ့ပါတယ်။ လက်ရှိမှာဆိုရင် စောလားထော်ဝါးဟာ နယ်ရှိုးတွေထွက်ဖြစ်နေပြီး Myanmar Idol က ဆန်ကာတင် ၁၁ ဦးနဲ့အတူ အုပ်စုလိုက် အခွေစီစဉ်နေသလို တစ်ကိုယ်တော်တေးအယ်လ်ဘမ်ကိုလဲ ထွက်ရှိနိုင်အောင်ကြိုးစားနေသူတစ်ယောက်ပါ။

-Myanmar Idol မှာ ဆုရပြီးတော့ လက်ရှိ ဂီတလှုပ်ရှားမှု အနေနဲ့ ဘာတွေလုပ်ဖြစ်နေလဲ။
အခုကျွန်တော် မဂ္ဂဇင်းတွေ ရိုက်ဖြစ်တယ်။ နောက်ပြီး Myanmar Idol ပြိုင်ပွဲဝင် ၁၁ ယောက်လုံးပေါင်းပြီး Media Company ကလုပ်ပေးတဲ့ အုပ်စုလိုက် အခွေထွက်ဖို့ရှိတယ်။ နောက်ကျွန်တော့်ရဲ့ တစ်ကိုယ်တော်ခွေလုပ်ဖို့ရှိပါတယ်။

-တစ်ကိုယ်တော်အခွေအတွက် ဘယ်လိုမျိုးပြင်ဆင်နေတာလဲ။
သီချင်းအားလုံးကိုတော့ အတတ်နိုင်ဆုံးအကောင်းဆုံးဖြစ်အောင် လုပ်နေပါတယ်။ အချိန်ကတော့ နည်းနည်းပေးရမယ်။ ဒါပေမဲ့ အကောင်းဆုံးဖြစ်အောင်၊ ပရိသတ်လဲကျေနပ်အောင်တော့ အကောင်းဆုံးကြိုးစားနေပါတယ်။

-ဘယ်လိုသီချင်းအမျိုးအစားတွေပါမလဲ။
ကျွန်တော်အားသန်တာကတော့ Slow တို့ Slow Rock တို့အားသန်တယ်။ နောက် Rock တွေလဲကျွန်တော်ကြိုက်တယ်။ အတတ်နိုင်ဆုံး Rock တော့ ထည့်ချင်တယ်။ မြူးဆစ်ပုံစံမျိုးစုံကို ထည့်ချင်တယ်။ ဒါပေမဲ့ကျွန်တော်က pop နဲ့ slow rock ကိုပိုပြီးအားသန်ပါတယ်။

-ပထမဆုံး မြန်မာနိုင်ငံမှာပြုလုပ်တဲ့ Myanmar Idol မှာ ပထမဆုကိုရရှိတဲ့ စိတ်ခံစားချက်ကိုလဲသိချင်ပါတယ်။
ကျွန်တော်တစ်ခါမှ မမှန်းရဲဘူး။ မျှော်လဲမမျှော်လင့်ထားဘူး။ မြန်မာနိုင်ငံမှာ ပထမဆုံးလုပ်တဲ့ပွဲမှာ ပထမဆုကိုရတာကတာ့ ဒါဟာ ပရိသတ်တွေရဲ့ကျေးဇူးကြောင့် ပရိသတ်တွေရဲ့ အားပေးမှုကြောင့်ပါ။ ပရိသတ်ကိုလဲအများကြီးကျေးဇူးတင်ပါတယ်။ အရမ်းလဲဝမ်းသာပါတယ် ။ ကျွန်တော်ဝမ်းသာသလိုပရိသတ်တွေလဲဝမ်းသာမယ်လို့ထင်ပါတယ်။

-ဒီပွဲမှာ အဆင့်ဆင့်ပြိုင်ခဲ့ရတယ်။ ကိုယ်နဲ့အတူတူဝင်ပြိုင်ရတဲ့ သူငယ်ချင်းတွေကို ကျော်လွှားပြီး Winner ဆုကိုရရှိပိုင်ဆိုင်ခဲ့တဲ့အတွက်အစ်ကို့ရင်ထဲကပီတိလေးကိုလဲသိချင်ပါတယ်။
သူငယ်ချင်းတွေအကုန်လုံးကတကယ်တော်လို့ကောင်းလို့အခုလိုအခြေအနေထိရောက်လာတာပါ။ ပြိုင်ပွဲသဘောအရ အပြိုင်အဆိုင်ကြိုးစားပြီးဆုယူရတာဆိုပေမဲ့ ကိုယ်လဲသူတို့ဆီက အတုယူရတာမျိုးတွေရှိတယ်။ စကားပြောတဲ့အချိန်မှာပဲဖြစ်ဖြစ်၊ သီချင်းဆိုတဲ့ အချိန်မှာပဲဖြစ်ဖြစ် သူတို့ကို လိုက်လေ့လာတယ်။ သီချင်းအပေါ် ဘယ်လိုသဘောထားတယ်။ ဘယ်လိုဆိုတယ်ဆိုတာတွေကိုလေ့လာဖြစ်တယ်။ လူတစ်ယောက်နဲ့တစ်ယောက်
မတူတာတွေရှိတယ်။ အဲ့ဒါကြောင့် အားလုံးဆီက ကောင်းတဲ့အချက်လေးတွေကိုလေ့လာပြီးအတုယူခဲ့တာမျိုးတွေရှိပါတယ်။

-ဒီပြိုင်ပွဲဝင်မပြိုင်ခင်မှာ ဘယ်လိုမျိုးပြင်ဆင်မှုတွေလုပ်ခဲ့ရလဲ။
ပြိုင်ပွဲရှိတာကို သိတာက ကျွန်တော့်အမေပေါ့။ အမေသိပြီး ဦးလေးကိုပြောတယ်။ ဦးလေးကနေ ကျွန်တော့်ကိုပြောပြတယ်။ အဲ့ဒီအခါကျမှ ကျွန်တော်က သိတာပေါ့။ ရန်ကုန်မှာပဲ ၀င်ပြိုင်ဖြစ်တယ်။ လူရွေးတော့မယ်ဆိုတော့ အချိန်ကသိပ်မရှိဘူး။ အဲ့ဒီမရှိတဲ့အ ချိန်လေးမှာပဲ ဘာသီချင်းနဲ့သွားပြိုင်ရမယ်ဆိုတာကို ကြိုပြီးစဉ်းစားထားတယ်။ လေ့လာထားတယ်။ ရသလောက်အချိန်လေးနဲ့ပေါ့။

-ဒီကိုရောက်လာတဲ့အချိန်မှာ ကိုယ့်လိုပဲလာပြိုင်ကြတဲ့သူတွေအများကြီးရှိတယ်။ အဲ့ဒီအချိန်မှာ ဒီပြိုင်ပွဲနဲ့ပတ်သက်ပြီးကိုယ့်ကိုကိုယ်ယုံကြည်မှုဘယ်လောက်ရှိလဲ။
ကျွန်တော် ၁၁ ယောက်ထဲပါပြီဆိုတဲ့အချိန်မှာ အရမ်းကိုပျော်တာပေါ့နော်။ ဒါကတော့ တာဝန်လဲ ပိုကြီးသွားပြီ။ ပိုပြီးကြိုးစားရမယ်ဆိုတာကိုလဲသိလာတယ်။ ပြိုင်ပွဲဝင် ၁၁ယောက်လုံးကတော်ကြတဲ့အတွက် ဆုရမယ်လို့မှန်းကိုမမှန်းထားခဲ့ဘူး။ အခက်အခဲကတော့ ရှိတယ်။ ဒါပေမဲ့ ၀ါသနာပါလို့လုပ်တဲ့ အလုပ်တစ်ခုဖြစ်တဲ့အတွက် ရည်မှန်းချက်လေးလဲ ထားထားတယ်။ ကျွန်တော်ဆုရဖို့အတွက်ဒီပြိုင်ပွဲကိုပြိုင်တာမဟုတ်ဘူး။ ပရိသတ်တွေ ကျွန်တော့်ကိုသိအောင်လို့၊ ၀ါသနာပါလို့၊ ပရိသတ်လက်ခံအောင်ကြိုးစားမယ်လို့စိတ်ဆုံးဖြတ်ပြီးဒီပွဲကိုဝင်ရောက်ယှဉ်ပြိုင်တာဖြစ်ပါတယ်။

-ဒီပြိုင်ပွဲမပြိုင်ခင်မှာရော ဂီတနဲ့ပတ်သက်ပြီး ဘယ်လိုလှုပ်ရှားမှုတွေလုပ်ခဲ့လဲ။
ဒီပြိုင်ပွဲမပြိုင်ခင်တုန်းက ကျွန်တော်တခြားပြိုင်ပွဲမှာလဲ ၀င်ပြိုင်ထားတယ်။ ဒီပြိုင်ပွဲက တခြားတစ်ခုကို ထပ်ပြိုင်မယ်ဆို ဒီဟာပြိုင်လို့မရဘူး။ အဲ့ဒါကြောင့် ၂ခုတည်းက ၁ ခုရွေးရမဲ့အချိန်မှာ ကျွန်တော်ဇဝေဇ၀ါဖြစ်နေခဲ့တယ်။ ဟိုမှာလဲပြိုင်ချင်တယ်။ ဒီမှာကတော့မြို့ငါးမြို့ဖြစ်တဲ့အတွက် နည်းနည်းတော့စိတ်လှုပ်ရှားမိတယ်။ အကယ်လို့ဒီဖက်ကိုရွေးလိုက်ပြီးမှ ကိုယ်မပါပဲပြုတ်ရင် ဟိုမှာလဲပြိုင်လို့မရ ၊ ဒီမှာလဲပြိုင်လို့မရဖြစ်မှာ စိုးရိမ်တယ်။ ဇဝေဇ၀ါလဲဖြစ်တယ်။ ဒါပေမဲ့ ကိုယ်ဆုံးဖြတ်ချက်ကို သေချာချလိုက်တယ်။ ကျွန်တော်ဟိုမှာ မပြိုင်တော့ပဲနဲ့ Myanmar Idol ကိုပဲပြိုင်မယ်ဆိုပြီးဆုံးဖြတ်ချက်ချခဲ့တာပါ။

-ဂီတပိုင်းနဲ့ပတ်သက်ပြီး ရှေ့မှာရော ဘယ်လို Plan တွေဆွဲထားလဲ။
ရှေ့ဆက်ပြီးတော့ ကျွန်တော်ဒီအလုပ်ကိုပဲသေချာလေးဆက်လုပ်သွားမယ်။ သီချင်းတွေဆိုသွားမယ်။ နောက်ပြီး မဂ္ဂဇင်းတွေရိုက်ဖြစ်မယ်။ သီချင်းတစ်ခုတည်းမဟုတ်ပဲ တခြားဟာလေးတွေလဲဝါသနာပါတယ်။ အတီးပိုင်းတွေရောပေါ့။ အားလုံးကိုဆက်လေ့လာသွားပါမယ်။

-Myanmar Idol ရဲ့ Winner ဆုရှင်ဖြစ်လာတဲ့အတွက် ကိုယ့်ကိုကိုယ်ဘယ်လိုမျိုးလေးထိန်းသိမ်းသွားမလဲ။
ပရိသတ်တွေရွေးချယ်ပေးခဲ့တဲ့အနုပညာသမားတစ်ယောက်ဖြစ်ခဲ့တယ်။ ပရိသတ်တွေမကြိုက်တာကိုရှောင်မယ်။ နာမည်မပျက်အောင်အတတ်နိုင်ဆုံးတော့ ကြိုးစားပြီးနေမယ်။

-Voting စနစ်ဆိုတာ မြန်မာနိုင်ငံမှာက သိပ်မရှိသေးဘူး။ အခုMyanmar Idol မှာက Voting စနစ်နဲ့သွားတဲ့အတွက်ကြောင့်မို့လို့ဒီစနစ်အပေါ် အစ်ကို့အမြင်လေးကိုလဲသိချင်ပါတယ်။
တချို့ပရိသတ်တွေကဒီစနစ်ကိုသိပ်လက်မခံချင်ကြဘူး။ တချို့တွေကတော့ လက်ခံကြတယ်။ ဒါပေမဲ့ ဒါ အမေရိကန်ကနေဆင်းသက်လာတဲ့ပြိုင်ပွဲတစ်ခုပေါ့လေ။ သူများနိုင်ငံမှာလဲဒီလိုပဲလုပ်တယ်။ ကိုယ့်နိုင်ငံမှာလဲဒီလိုပဲသဘောသဘာဝသက်ရောက်တဲ့အတွက် ဒီလိုပဲလုပ်တယ်။ စည်းကမ်းချမှတ်ထားပြီးသားဆိုတော့ မလုပ်လို့မရဘူးလေ။ ကျွန်တော်လဲပြိုင်ပွဲစည်းကမ်းအရဒီလိုလုပ်တာကို ကောင်းတယ်လို့ပဲမြင်ပါတယ်။

-Voting စနစ်နဲ့ပတ်သက်ပြီးအဆင့်ဆင့်ကျော်တက်လာတယ်။ ကျော်တက်လာတဲ့အပေါ်မှာ ဒီအဖွဲ့နဲ့ပတ်သက်ပြီးကြုံရတဲ့ ကောလဟလ တွေအပေါ် ပြိုင်ပွဲဝင်နေစဉ်အချိန်မှာ ဘယ်လိုခံစားရလဲ။
ကောလဟလကတော့ လာမှာပဲလေ။ ကျွန်တော့ရဲ့ ခံယူချက်က ရိုးရိုးနဲ့ရှင်းရှင်းလေးပဲ။ ကျွန်တော်တို့ပြိုင်တယ်။ ကောင်းတဲ့သူရမယ်။ သူပြိုင်ခဲ့တဲ့ပြိုင်ပွဲမှာ သူဘယ်လောက်ကောင်းခဲ့လဲအဲ့ဒါကိုကြည့်ပြီး Vote များများပေးသင့်တယ်။ အကယ်လို့ကိုယ်မကြိုက်ဘူး။ မကောင်းဘူးဆိုရင်လဲမပေးစေချင်ဘူး။ ဆိုတာကောင်းတယ်။ လက်ခံတယ်ဆိုရင်တော့ ပေးသင့်ပါတယ်။

-တကယ်ကောင်းလို့သူတို့တကယ် အားပေးလိုက်တယ်ဆိုတစ်မျိုး အဲ့ဒီလိုမဟုတ်ပဲ ပုဂိုလ်စွဲ ပြီးမကောင်းတဲ့သူကို Voting အများကြီးပေးလိုက်တဲ့အတွက် ကိုယ့်ကိုကျော်သွားမှာတွေရော အဲ့ဒီလိုခံစားချက်တွေဖြစ်ဖူးလား။
အဲ့ဒီခံစားချက်တော့ဖြစ်တယ်။ ဒါပေမဲ့ ဘာပဲဖြစ်ဖြစ် Voting က ကောင်းသည်ဖြစ်စေ၊ မကောင်းသည်ဖြစ်စေ၊ လူမျိုးစွဲပဲဖြစ်ဖြစ်၊ ပုဂိုလ်စွဲပဲဖြစ်ဖြစ် အဲ့ဒီလူကလဲ သူ့ဖက်ကတော့ မသိဘူးလေ။ ပေးတဲ့ပရိသတ်တွေကပေးပေမဲ့ သူကမကောင်းတဲ့အတွက်သူ့ရဲ့ရှေ့ဆက်ရမဲ့ခရီးကလှပမှာမဟုတ်ဘူးလေ။ ကောင်းတဲ့သူကိုပဲပေးတာပိုကောင်းပါတယ်။ ဒါပေမဲ့ ကျွန်တော့်ကိုပေးပါလို့ပြောတာမဟုတ်ဘူး။ ကျွန်တော်လဲအဲဒီလောက်ထိကောင်းတာမဟုတ်ဘူး။ အတတ်နိုင်ဆုံးတော့ကြိုးစားတာပါပဲ။ ပရိသတ်တွေလဲလက်ခံတယ်ဆိုတော့ အရမ်းဝမ်းသာတယ်ဗျာ။

-အသံနဲ့ပတ်သက်ပြီး ဘယ်လိုမျိုးလေးဂရုစိုက်ဖြစ်လဲ။ တချို့ဆို အသံနဲ့ပတ်သက်ပြီး Creation တွေအရမ်းလုပ်ကြတယ်လေ။ အစ်ကိုရော အဲ့ဒီလိုမျိုးဝါသနာပါတာမျိုးရှိလား။
အဲ့ဒါကလဲ လူတစ်ယောက်ရဲ့ ပါရမီနဲ့သွားဆိုင်တာပေါ့လေ။ ဘုရားပေးထားတဲ့ အသံပါရမီက တချို့တွေကျတော့ ကြိုးစားပြီးရှာဖွေရတယ်။ တချို့တွေကျတော့ သူ့ဟာသူအော်တိုပါလာပြီးသားပေါ့။ ကိုယ်ကတော့နှစ်ခုစလုံးကိုသဘောကျတာပေါ့။ ကိုယ့်မှာရှိထားတဲ့အသံကိုလဲကြိုက်တယ်။ အဲ့ဒါကြောင့်ထိန်းသိမ်းထားတယ်။ အခုလောလောဆယ် အသံလေ့ကျင့်မှုအပိုင်းကိုလေ့လာချင်တယ်။ ဒါပေမဲ့အချိန်အခါကလဲမရှိဘူးဖြစ်နေတယ်။ ဒါပေမဲ့အရင်ကထက်ကောင်းအောင်တော့ကြိုးစားနေတယ်။

-မြန်မာနိုင်ငံရဲ့ ဂီတလောကမှာလေးစားပြီး အားကျရတဲ့ အဆိုရှင်တွေရှိရင်လဲသိချင်ပါတယ်။
အားလုံးကိုကျွန်တော်ကြိုက်တယ်။ မြန်မာနိုင်ငံက အဆိုတော်တွေကိုသဘောကျတယ်။ သူတို့ကလဲကိုယ့်အသံနဲ့ကိုယ်ဆိုကြတယ်။ အဲ့ဒါကြောင့်အားလုံးကိုအားပေးပါတယ်။

-ကိုယ့်ကိုကိုယ်အဆိုရှင်ကောင်းတစ်ယောက်ဖြစ်ဖို့ဘယ်လိုကျင့်ကြံနေထိုင်သွားမလဲဆိုတာကိုလဲသိချင်ပါတယ်။
ကျွန်တော်က အခုပရိသတ်တွေတင်မြှောက်ထားတဲ့အဆိုရှင်ပရိသတ်လက်ခံထားတဲ့အဆိုရှင်။ ဒါပေမဲ့ကျွန်တော့်မှာလိုအပ်ချက်တွေအများကြီးရှိတယ်။ ဆက်ကြိုးစားသွားဖို့လဲလိုတယ်။ ကိုယ့်ကိုကိုယ်တော့ အားရကျေနပ်မှုရှိလာတဲ့အထိပိုကြိုးစားဖို့လိုတာပေါ့နော်။

-အစ်ကို့ရဲ့ ဇာတိနဲ့ မိသားစုအကြောင်းလေးကို ပရိသတ်ကြီးနဲ့မိတ်ဆက်ပေးပါဦး။
ဧရာဝတီတိုင်း ဒေသကြီး မြောင်းမြမြို့နယ် ခမ်းကြီးကျေးရွာမှာနေပါတယ်။ မိသားစုတွေကတော့ မိဘနှစ်ပါးနဲ့ညီတွေ၊ ညီမတွေအားလုံးပေါင်း ၁၀ယောက်ရှိပါတယ်။ မောင်နှမ ရှစ်ယောက်ရှိပါတယ်။ ကျွန်တော်ကအကြီးဆုံးပါ။ အခုအနုပညာအလုပ်လုပ်နေတဲ့အတွက်ရန်ကုန်မှာပဲအနေများပါတယ်။

-ဒီပြိုင်ပွဲဝင်မပြိုင်ခင်တုန်းက ဘယ်နေရာတွေမှာသီချင်းဆိုခဲ့ဖူးလဲ။
ဘုရားကျောင်းနဲ့ ကရင်အစည်းအဝေးပွဲတွေမှာဆိုခဲ့ဖူးပါတယ်။

-ရှေ့ဆက်ပြီးလျှောက်လှမ်းသွားမဲ့ အစ်ကို့ရဲ့ အနာဂတ်အစီအစဉ်လေးကိုလဲသိချင်ပါတယ်။
ကျွန်တော်အခု ၁၁ ယောက် အခွေလုပ်နေတယ်။ နောက်တစ်ကိုယ်တော်စီးရီးအမြန်ဆုံးထွက်နိုင်အောင်လဲကြိုးစားသွားမယ်။ ဒီ့ထက်အများကြီးပရိသတ်လက်ခံနိုင်မဲ့အရာမျိုးတွေကိုလဲဆက်လုပ်သွားမှာပါ။ သီချင်းနဲ့ပတ်သက်တာတွေကိုလဲ အများကြီးကြိုးစားသွားမယ်။ အလုပ်တွေအများကြီးဆက်လုပ်သွားပါမယ်။


Credit : http://www.trend.com.mm/2016/05/20/music-9565